Ti sistematik agi nyengkaum nyerenih baru, ngemanah sereta meri kelala atur baru ngambika seruran relevan enggai pemansang pengidup raban bansa diatu

Sikie lebuh bejaku ba 'Majlis Penghargaan Majlis Adat Istiadat Sarawak' ditu kena Hari Tiga.

"MAIS tu mesti terus nyadi platform besai dalam pengawa negika adat  ngena chara ngetan, ngemansang  sereta ngerembaika adat asal ba Sarawak,"

Dato Sri John Sikie Tayai

Menteri ba Opis Premier Sarawak

KUCHING: Perintah Sarawak majak chakah ngemodenka enggau ngenegapka adat bansa asal ngena chara ti lebih sistematik nyengkaum nyerenih baru, ngemanah sereta meri kelala atur baru ngambika seruran relevan enggai pemansang pengidup raban bansa diatu.

Menteri ba Opis Premier Sarawak, Dato Sri John Sikie Tayai madahka, aum Majlis Adat Istiadat Sarawak (MAIS) ti diatur berengkah ari 4 ngagai 6 Mei 2026 nyadi platform beguna endur berandauka isu bekaul enggau adat nyengkaum proses modifikasyen enggau mansik baru adat pupu raban bansa ba nengeri tu.

Nitih ke iya, chara nya beguna amat dikena nentuka adat tetap dijaga seraya ulih mansang setipak enggau ubah rama enggau guna komuniti kemaya hari tu.

"MAIS tu mesti terus nyadi platform besai dalam pengawa negika adat  ngena chara ngetan, ngemansang  sereta ngerembaika adat asal ba Sarawak," ku iya bepelasarka ripot Unit Komunikasi Awam Sarawak (UKAS) kena Hari Empat.

Sikie madahka pekara nya lebuh bejaku ba 'Majlis Penghargaan Majlis Adat Istiadat Sarawak ditu, kena Hari Tiga.

Nambah nya, iya madahka pengawa nyirika Ahli Majlis ungkup timpuh tiga taun berengkah 1 Mac 2026 ngagai 24 Februari 2029 udah dikemendarka Majlis Mesyuarat Kerajaan Negeri (MNPG) kena 16 April apin lama setipak enggau pekara ditetapka dalam Ordinan Majlis dat Istiadat Sarawak 1977.

Iya mega ngenataika pengaga ati ngagai raban Ahli Majlis ke baru dichiri sereta muji komitmen Ahli Majlis ke dichir baru ba pengawa ngenegapka institusyen adat ba nengeri tu.

Berebak enggau tu iya meri terima kasih ngagai Datu Ronnie Edward ti nyau deka nembuka servis nyadi Ketuai MAIS kena 3 Jun pengudah dua penggal nyadi ketuai organisasyen nya.

"Sepemanjai iya gawa, mayuh inisiatif udah dipejalaika nyengkaum pengawa kodifikasyen enggau mansik baru adat lalu diatu ba renggat kepenudi ungkup sekeda komuniti besai," ku iya.

Entara adat ke udah ba renggat kepenudi, ku iya, nyengkaum Adat Iban 1993 enggau Adat Bidayuh 1994, kelimpah ari mansik baru Adat Kayan enggay Kenyah ti udah disetuju dikenataika ngagai Jabatan Peguam Besar Negeri Sarawak ngambika proses mansik terus dipejalaika.

Ngenang silik agi, iya madahka, sekeda pansik bukai baka Adat Bisaya 2004, Adat Nombawang 2004, Adat Kelabit 2008 enggau Adat Penan 2011, agi ba renggat dipansik.

Dalam pengawa ngenegapka gunsyen MAIS, seksyen baru ditumbuhka iya nya Seksyen Budaya dan Tradisi dikena nambahka pemereti ati sereta pengaga ngagai adat, budaya enggau sejarah  pupu raban bansa ba Sarawak.

Iya nyemetak madahka Perintah Sarawak mega ngemendarka pengawa nambahka elawin enggau perengka guna dikena Ahli Majlis awakka ulih ngangkatka profesionalisme sereta efisyen bejalaika tanggung pengawa.

Entara ti udah dikemanahka agi nyengkaum elawin ninting bulan ditikika ngagai RM1,000 enti dibandingka RM500 sebedau tu, kelimpah ari elawin baum sereta perengka guna perubat enggau pakaian rasmi.

Iya nyemetak madahka nya ngayanka komitmen ti nadai ngetu dipejalaika Perintah Sarawak dikena nyukung tanggung pengawa MAIS nyadi institusyen beguna ba pengawa nyaga enggau ngemansangka adat asal.

Bisi datai ngagai aum nya nyengkaum Sekretari Perintah Sarawak. Jabatan Peguam Besar Sarawak sereta bakih strategik ti bukai ti bebendar nentuka pengawa negapka adat ulih dipejalaika begulai.